"Fíllinn var veikur"

Mikið svakalega eru strákarnir mínir búnir að hlakka til dagsins í dag, allir þrír.  Hér í Horsens er staddur sirkus Arena sem er mjög stór og víst flottur sirkus (munið þið ekki eftir honum í sjónvarpinu á gamlársdag í denn) og við vorum búin að ákveða að fara að sjá þennan sirkus í dag. 

Við fórum í morgun til að tryggja okkur miða á sirkusinn í kvöld.... og hvað haldið þið, það var uppselt.  Voru nú góð ráð dýr og við tókum okkur smá tíma í að upphugsa hvað við gætum sagt við Emil litla sem var spenntastur allra fyrir sirkusferðinni.  Lendingin varð sú að fíllinn veiktist skyndilega og keypti hann sem betur fer þá skýringu.  Hann hefði aldrei skilið það að það væri uppselt.  Við fórum samt og skoðuðum fílana sem eru í girðingum við svæðið sem sirkusinn er og fannst Emil litla það alveg rosalega skemmtilegt, enda aldrei áður séð fíl á sinni stuttu ævi.  

Við vitum að það kemur annar sirkus til Horsens í maí og þá er víst betra að tryggja sér miða í tíma til að svona endurtaki sig ekki.  

Emil fékk svo boð um að fá að fara í bíó í staðinn í dag og varð hann mjög ánægður með þær málalyktir, enda finnst honum svo gaman að fara í bíó, sérstaklega að fá að fara einn með pabba sínum.

Framundan er fjögurra daga helgarfrí hjá okkur öllum, þar sem uppstigningardagur lendir á fimmtudegi eins og alltaf, þá hafa Danir þann háttinn á að ef frídagur lendir á fimmtudegi, þá er alltaf líka frídagur á föstudegi.  Ekki slæmir samningar það.  Ekkert sérstakt planað hjá okkur um helgina en ég er ekki í vafa um að við finnum okkur eitthvað skemmtilegt til að gera.

 

 

 

 

 

 

 

 

Nótt Nótt

Kolbrún 

Athugasemdir

[Guðmundur Þór Jónsson, 1.5.2008 kl. 01:08]

Gott að redda sér. Hvít lygi skaðar engann. Væri alveg til í að sjá sirkus sko. Hvenær er hann í mai??? Hafið það gott.

[Helga Jónsdóttir, 1.5.2008 kl. 09:09]

Gott að Emil skyldi gleypa við þessari skýringu.  Magnús hefði sko ekki gleypt við þessu, hefði orðið alveg brjálaður.  Ég fór á þennann sirkus þegar ég var skiptinemi úti í Danmörku fyrir (vá ég þurfti að fara að telja ) 22 árum síðan takk fyrir (fattaði ekki hvað ég er orðin gömul ) og það var alveg æðislegt að horfa á þetta.  Myndi sko alveg vera til í að fara með mín börn að sjá þetta.  Spurning hvort þeir verði einhversstaðar í ökufæri í júní-júlí og maður geti látið verða að því.

[Guðborg Eyjólfsdóttir, 1.5.2008 kl. 09:59]

Fílarnir geta alltaf orðið veikir  Ég er svo heppin að ég er líka í 4 daga helgarfríi vann 2 tíma lengur síðustu 3 daga og fæ í staðinn frí í dag  Hlakka til að hitta ykkur í júní, þetta fer að koma ég er að kafna úr spenning get valla beðið