skemmtanalíf miðborgar

Þegar ég var ung, allavega miklu yngri kunni ég hreinlega allt utanað hvað varðar skemmtanalífið í miðbænum.  Ég fór í bæinn um hverja helgi.  Áður en ég náði aldri inn á skemmtistaðina hékk ég á Hallærinsplaninu góða, auk þess sem ég reyndi hvað ég gat að komast inn á skemmtistaði á borð við Sigtún og Klúbbinn og það var mikið gaman þegar það tókst.  Þegar ég náði aldri til að komast inn á skemmtistaði borgarinnar varð mitt annað heimili CAFE AMSTERDAM.  það var hrikalega skemmtilegur tími í endurminningunni, Paparnir með Ingvari söngvara og trúbadorinn Siggi Björns skiptust á að vera með lifandi tónlist á Amsterdam og það var hreinlega alltaf jafn gaman þar.  Þá var jafnvel dansað upp á borðum og Mustang Sally var lag sem var mikið spilað á Amsterdam. 

Eftir að ég átti börnin mín hef ég eiginlega alveg látið skemmtanalíf miðborgar eiga sig, enda tel ég að ég hafi tekið út minn skerf í djammi og djúsi á þessum frábæru árum.  

Í gærkvöldi aftur á móti datt okkur Bertu í hug að kíkja á kaffihús, já á laugardagskvöldi.  Við vorum nú bara að spá í Mílanó eða eitthvað svona saklaust en það var lokað.  Þannig að við tókum stefnuna í miðbæinn og enduðum á gamla Hressó.  Ég verð að segja að þessi reynsla var einhvernveginn ný fyrir mér, ég hef oft skemmt mér vel á Hressó í gamla daga en þá var opið út í garð og hljómsveitir á borð við Sirkus Babalú tróðu upp... munið þið eftir henni?  Í gærkvöldi var aftur á móti ekki opið út í garð og þegar við Berta fórum heim í draumalandið var komið hellingsfyllerí á Hressó með tilheyrandi saltstaukum, væntanlega fyrir tekílað.  Ég er ekki frá því að ég hafi haldið aðeins fastar um veskið á leið minni í bílinn, leist ekki vel á sumt af fólkinu sem var í miðbænum.  Það sem var kannski samt soldið áberandi voru brjóstgóðar konur sem gleymdu að fara í brjóstahaldara,hehe..

En ég held að ég haldi mér bara frá miðbænum næstu laugardaga, og haldi mér bara í örygginu í Breiðholtinu.  En sannarlega var samt gaman að kíkja aðeins á lífið.  Takk fyrir kvöldið Berta.

Kolbrún 

Athugasemdir

[Dóra (IP-tala skráð) 4.10.2006 kl. 18:01]

Varst það ekki þú sem kynntir þessa staði fyrir saklausu sveitarstúlkunni og spilltir henni þegar hún flutti í höfuðborgina til að nema Þroskaþjálfafræði.. Það var kannski ekki svo erfitt eða?..Amsterdam var staðurinn það var bara gaman