Alnæmi

Ég horfði á þáttinn hennar Sirrýjar í kvöld, Örlagadagurinn.  Átakanlegur þáttur, nema ég sé orðin svona ofur viðkvæm á fullorðinsárum. 

Þegar ég var í menntaskóla var umræðan í þjóðfélaginu mikil um alnæmi.  Það voru auglýsingaspjöld um allan bæ um alnæmi... ég man meira að segja nákvæmlega hvar auglýsingaskiltið var staðsett á Hlemmi en Hlemmur var daglegur viðkomustaður hjá mér, miðbæjarrottunni, áður en ég eignaðist bíl.  Umræðan var lika mikil í skólanum.  Ég man eftir einu skólaballi hjá FB sem var kallað smokkaball og þegar við keyptum okkur miðann á ballið fengum við smokk í kaupbæti.  Átti þetta að vekja fólk til umhugsunar um alnæmi.  Reyndar var skemmtinefndin ekki með meira á milli eyrnanna en svo að smokkurinn var HEFTUR við miðann hehehe.

Hvernig er staðan í dag 20 árum seinna?  Ég heyri næstum aldrei talað um alnæmi í dag.  Samt er fólk ekkert hætt að smitast af alnæmi.  Breytingin á þessum árum hefur meira að segja verið á þann veg að nú smitast frekar gagnkynhneigt fólk heldur en samkynhneigðir.  Ég sannarlega vona að þátturinn í dag vekji fólk aftur til umhugsunar um þennan hræðilega sjúkdóm.  Það ætti að vera miklu meira vitað um sjúkdóminn í dag heldur en fyrir 20 árum síðan og það ætti að vera miklu meira vitað um smitleiðir í dag heldur en þá líka.  Mér finnst ég hafa verið ílla upplýst um þessar breytingar og get varla verið ein um það.  Ef við erum svona ílla upplýst af þjóðfélaginu okkar, kyndir það ekki undir fordóma áfram.  Hefur eitthvað breyst í þeim?  Myndi maður drekka úr sama glasi og HIV smitaður einstaklingur?  Myndi maður nota sama klósett og HIV smitaður einstaklingur?  Myndi maður kyssa HIV smitaðan einstakling á munninn? 

Einu skiptin sem ég hef verið minnt á Alnæmi síðustu ár er í tengslum við meðgöngur.  Ég hef alltaf þegið alnæmipróf á mínum meðgöngum en thats it.

Kolbrún out

Athugasemdir

[Guðmundur Þór Jónsson (IP-tala skráð) 2.9.2007 kl. 23:57]

Sæl Kolla. Já ég er sammála þér um að þessi sjúkdómur er ekki á allra vörum í dag. Ég þekki einn strák dáldið vel sem er kominn með alnæmi og hann er ekki orðinn þrítugur! en hvað um það. Það verða allir að taka ábyrgð á sjálfum sér og ekki bara hoppa upp í rúmið með hverjum sem er nema að vera með smokk!  Hvers virði er lífið ef maður sængar hjá einhverjum og greinist svo með alnæmi og enginn vörn var notuð. En hvað um það, þegar einhver svona nálægt manni er með alnæmi þá hugsar maður sig tvisvar um: á ég að kyssa, faðma hann, fá sopa hjá honum, taka í höndina á honum og svo fram eftir götunum. En mér finnst að allir eiga að fara GÆTILEGA til að getað lifað hjónalífi til áttræðsaldur en styttra! Hafið það gott. Góða nótt.

[Rebbý, 3.9.2007 kl. 18:26]

Ég fékk nett sjokk þegar vinur minn greindist HIV smitaður fyrir rúmu ári síðan og átti svolítið bágt með að vita hvað mátti og hvað mátti ekki og var að reyna að leita mér upplýsinga.  Ég var svo bara svo heppin að hann passaði sig og þrátt fyrir að það sé í lagi td að drekka úr sama glasi þá bauð hann aldrei upp á það.
Um leið og ég sá hann þá gleymdi ég því að hann væri með þennan agalega sjúkdóm og get ekki séð að ég láti neitt öðruvísi í nærveru hans í dag en annarra, bara myndi þurfa að passa mig myndi hann slasast.