HUSK P SKIVEN

Reynslusaga dagsins tengist svokölluðum P skífum en P skífur eru í framrúðu á öllum bílum í Danmörku.  Í raun gerir P skífan þér kleift að leggja bílnum gjaldfrjálst á bílastæðum í Danmörku í 1-2 klst.  Það sem þú þarf að gera áður en þú yfirgefur bílinn á bílastæði er að stilla tímann sem þú reiknar með að koma til baka á p skífuna í bílnum. 

Svona lítur P skífa út

 

 

 

 

Ég hef aldrei séð einn einasta stöðumælavörð hér í Horsens.  Mér fannst það bara þvílíkur lúxus að geta lagt bílnum hvar sem er án þess að þurfa að borga í stöðumæli.  Kannski hef ég verið aðeins of kærulaus, því þegar við fórum í matvörubúðina seinnipartinn í dag þá gleymdum við að stilla p skífuna í bílnum, Hlynur mundi eftir því þegar við vorum kominn inn í búðina en það var mér að kenna að hann fór ekki til baka til að stilla skífuna, ég sagði við hann að þess þyrfti örugglega ekki lengur því að klukkan væri orðin svo margt.  Og vegna þessa fengum við fyrstu lexíu í Danmörku.  Stöðumælavörður kom auðvitað og gaf okkur skemmtilega háa sekt fyrir það að hafa ekki stillt P skífuna, 510 danskar krónur takk fyrir.  Það er alveg öruggt mál að P skífan verður alltaf notuð í framtíðinni, svona mistök gerir maður bara einu sinni.

 

En nóg um það

Deginum í dag eyddum við fjölskyldan í Árósum.  Við höfum í nokkra daga ætlað að fara þangað í tívolí en það hefur dregist vegna veðurs.  Í dag var keyrt yfir í tívolíið en þetta tívolí er  miklu miklu flottara en tívolíð í Kaupmannahöfn (samt bara á 1/4 af prísnum hjá þeim).  Strákarnir skemmtu sér svo vel og tíminn leið svo hratt að við höfum ákveðið að fara aftur í næstu viku og klára að skoða allan garðinn, við náðum bara að fara yfir hluta af honum í dag.

 

 

 

 

 

 

 

Fullt af nýjum myndum í albúmi

Biðjum að heilsa héðan

Kolbrún og co 

Athugasemdir

[Berta María (IP-tala skráð) 2.8.2007 kl. 22:33]

Loksins erum við komin í netsamband.....vorum að koma til Húsavíkur eftir 2ja daga ferð um Vestfirði:) 

Það virðist vera endalaust mikið skemmtilegt að gera í Horsens og þar í kring, okkur á greinilega ekki eftir að leiðast sem heimavinnandi húsmæðrum:)

Nú er bara ein vika þar til við verðum komin til ykkar, erum orðin þvílíkt spennt.
Æðislegar myndirnar af ykkur og gaman að sjá hvað strákarnir eru að "fíla" sig vel.
Sjáumst og heyrumst***