Áfram Latibær

Í dag fór ég með strákana mína ásamt Bertu og Hermanni Veigari í Latabæjarmaraþon.  Það var mjög gaman að taka þátt en það þarf samt einhverju að breyta að ári ef þetta verður aftur í boði fyrir landsmenn.  Margir krakkar eru mjög hrifnir af Latabæjarfólkinu og því var fólksfjöldinn þvílíkur sem tók þátt að ég held að ég hafi aldrei séð annað eins.  Við vorum langt frá því að vera aftast í röðinni við rásmarkið en við vorum samt ekki lögð af stað þegar fyrstu keppendur voru komnir í mark.  Börnin eru auðvitað mjög ánægð með þetta framtak, enda fengu þau flotta Latabæjarboli, buff, leikfang, epli og fleira í poka og svo verðlaunapening með íþróttaálfinum og sollu striðu þegar þau komu í mark.  Ég held hreinlega að þetta sé of spennandi fyrir börnin og því þurfi skipuleggjendur að hafa þetta einhvernvegin öðruvísi á næsta ári til að koma í veg fyrir þennan mikla troðning.  Það var nefnilega ekki bara troðningur í upphafi hlaupsins heldur var ekki minni troðningur í lokin þegar verið var að afhenda verðlaunapeningana.

En við gerðum bara gott úr þessu, enda frábært veður til útivistar, fórum svo og gáfum öndunum brauð og enduðum svo á köku og kóki á Mokka (ásamt fullt af geitungum).

Takk fyrir daginn Berta og Hermann.

Kolla