Brauð frá Finnlandi

Í gær þegar ég kom heim úr vinnunni var búið að dekka borð á heimilinu og allur karlpeningurinn sat og beið eftir húsfrúnni... ástæðan var sú að húsbóndinn minn hafði tekið sig til og bakað brauð að finnskum hætti.  Til að fræða ykkur aðeins um innihald brauðsins þá eru bara tvær tegundir af hráefni í brauðinu, soðnar kartöflur og fínmalað bygg.  Brauðið bragðaðist ágætlega, reyndar ekkert mjög bragðmikið en alls ekki vont.... bara öðruvísi en við eigum að venjast.

Mér þótti svo vænt um hvað þeir feðgar voru búnir að hafa mikið fyrir þessu.  Strákarnir mínir voru búnir að labba niður í Mjódd til að kaupa kartöflustappara fyrir pabba sinn og engin var búin að smakka á brauðinu fyrr en ég kom heim úr vinnunni.  Reyndar vildi nú miðsonurinn ekki labba aftur heim frá Mjóddinni nema að hann myndi fá göt í eyrun áður en hann tæki heimleiðina en pabbinn náði nú að tala hann af því, í bili.

Takk Hlynur minn fyrir að vera svona góður eiginmaður

Love

Kolbrún