Gamaldags ég

Ég fór á vídeóleigu í kvöld.  Það gerist ekki oft að ég fari sjálf til að leigja mynd fyrir mig og ektamanninn en hann sendi mig í kvöld á leigu og sagði mér að ég mætti bara leigja það sem mig langaði að horfa á.  Hann myndi horfa með mér svo framarlega að ég myndi kaupa nóakropp fyrir hann.  Ég fór á Vídeóheima og fann mjög fljótlega mynd sem mig hefur lengi langað að sjá, Holyday með Jude Law og Cameron Diaz.  Miðsonur minn var með mér á leigunni og fór að skellihlæja þegar hann sá hvaða mynd ég hafði valið.  Hann sagði að ég fengið aldrei pabbann á heimilinu til að horfa á þessa mynd með mér.  Bætti við að hann skildi sko vera niðri í sínu herbergi og ekki trufla ástarmyndina.  Ég hélt mínu striki og tók myndina.  Fór á kassann til að borga og var beðin um kennitöluna mína.  Þegar afgreiðslumaðurinn sló inn kennitöluna mína sagði hann að hann yrði að fá að sjá skilríki hjá mér því ég hefði ekki leigt mynd síðan 1997.  Spáið þið í því hvað ég er eitthvað gömul, ég fer ekki einu sinni á vídeóleigur.  Það tók ekki betra við þegar ég var búin að borga, ég kvittaði jú nafnið mitt á debetfærsluna og ætlaði að fara út.  Afgreiðslumaðurinn kallaði á eftir mér og sagði að ég yrði að kvitta líka nafnið mitt á einhvern leigusamning.  Hann sá greinilega að ég var óvanur viðskiptavinur eftir þetta, allavega eyddi hann hellings tíma í að útskýra fyrir mér að ef ég vildi svo skila myndinni þegar ekki væri opið á leigunni gæti ég notað lúgu og sýndi mér hana vel.  Hann heldur örugglega að ég sé orðin svo gömul að ég verði vöknuð kl 6 í fyrramálið í panik yfir því að þurfa að skila mynd, hehe.

En allavega, við hjónin erum að fara að horfa á Holyday og fá okkur nóakropp....

Góða helgi

Kolbrún

Athugasemdir

[Jóna Á. Gísladóttir, 23.6.2007 kl. 00:23]

Óska eftir krítikk á myndina. hef heyrt svo misjafnar sögur.

[Ingi Geir Hreinsson, 23.6.2007 kl. 09:56]

Bwahahahaa, ég vil sko heyra viðbrögð lillebro, bæði þegar hann sá hulstrið á myndinni og líka hvað honum fannst um verkið. Vonandi var amk kroppið gott.

[Jóna Á. Gísladóttir, 23.6.2007 kl. 21:37]

Husband of the year award er ekki til umræðu fyrr en þú sést tárast yfir rómantískri ræmu

[Kolbrún Jónsdóttir, 23.6.2007 kl. 21:39]

Sæl Jóna, ég hafði mjög gaman af myndinni, góð afþreying:)

[Jóna Á. Gísladóttir, 23.6.2007 kl. 23:03]

Takk Kolbrún. Kíki á hana næst þegar ég er í stuði fyrir rómantíska gamanmynd.

[Guðný Anna Arnþórsdóttir, 24.6.2007 kl. 01:18]

Ég hefði viljað vera fluga á vegg í Videoheimum....!