Ekki í fyrsta sinn

Að lesa svona frétt kemur mér ekki á óvart.  Við lentum í samskonar dæmi þegar miðsonur var í 1. bekk í grunnskóla.  Hann og vinur hans fengu greinilega að vera eftirlitslausir á bílastæði skólans og í óvitaskap klifruðu þeir upp á bíl eins starfsmannsins og notuðu hann sem rennibraut.  Skemmdir á bílnum voru auðvitað þónokkrar.  Þrátt fyrir marga fundi með skólastjórnendum og mótmæli af okkar hálfu þurftum við að greiða fyrir skemmdirnar á bílnum, eða réttara sagt tryggingarnar okkar þar sem skemmdirnar voru upp á þriðja hundrað þúsund.  Okkar kostnaður fólst í sjálfsábyrgðinni og það að við fengum ekki stofnávísun það árið. 

Ég vona að það fólk sem á í hlut í þessari frétt fái þetta greitt öðruvísi.  Við erum með börnin okkar í leikskólum og grunnskólum og treystum því að það sé fylgst með þeim þar og treystum því að þau fái ekki að vera eftirlitslaus í svona óvitaskap.  Þetta eru lítil börn sem gera sér enga grein fyrir afleiðingunum. 

Ég verð bara reið þegar ég les um þetta.

Kolbrún

Ósátt við dagvistina

Athugasemdir

[Jóna (IP-tala skráð) 3.5.2007 kl. 08:13]

Nákvæmlega en ég skil ekki eitt, var leikskólabarn á bílaplaninu að leika sér eða kasstaði hann hlutum yfir girðinguna á bílana?  Langar að fá svör við því..

[Ingi Geir Hreinsson, 3.5.2007 kl. 16:45]

Lítum aðeins öðruvísi á þetta. Ef þú ert með barnið þitt úti á gangi og það skemmir bíl, er þá ekki litið svo á að þú berir ábyrgð á því og greiðir það tjón sem varð.

Barn sem er í skóla er ekki í þinni umsjá, það er fólk í skólanum sem þiggur laun fyrir að gæta þess að barnið fari sér ekki að voða. Á það fólk þá ekki að axla ábyrgðina? Það finnst mér. Hvað þá þegar barnið er með sérþarfir og væntanlega þarf aukna gæslu miðað við önnur börn.