Fjöldamorð afleiðing eineltis?

Dan Olweus skilgreinir einelti þannig að  það sé einstaklingur sem lendir reglulega og yfir ákveðið tímabil í neikvæðu áreiti af hendi eins eða fleiri.

Ég velti því fyrir mér hvort þetta hrottalega morð í háskólanum í Virginíu sé afleiðing eineltis, þó það á engan hátt afsaki það.  Það hefur komið fram í fréttum að morðinginn varð að lifa við háð frá skólafélögum sínum í Virginia Tech, að hann hafi þurft að að hlusta á endalausar glósur frá skólafélögum sínum og ef hann opnaði á sér munninn var honum sagt að fara aftur heim til Kína.

Einelti er vandamál sem viðgengst í öllum skólastigum og á mörgum vinnustöðum.  Einelti er vandamál sem erfitt er að ná að uppræta.  Einelti hefur viðgengist í aldanna rás og á eflaust eftir að fá að viðgangast um ókomin ár.  Skólayfirvöld ná því miður ekki að stoppa þetta innan veggja skólanna, enda er einelti oftast framið þegar engin sér til.  Ég held að Íslendingar sem og aðrir þurfi að taka þetta hroðalega fjöldamorð og læra af því.  Hvað getum við gert til að stöðva einelti, í skólum og á vinnustöðum? 

Ég er lánsöm að hafa aldrei orðið fyrir einelti.  En einn skólafélagi minn í grunnskóla varð fyrir einelti.  Þó svo að maður hafi ekki tekið beinan þátt í því, þá tók maður þátt með því að hlæja.  Kannski vildi maður bara vera hipp og kúl og þorði ekki að stoppa þetta.  Sjálfsagt var það óþroskinn sem átti þar hlut að máli.  Ég get eiginlega ekki ímyndað mér hvernig viðkomandi nemanda hefur liðið í skólanum en í dag get ég kannski gert mér smá mynd af því, ég hef frétt af honum og veit að hann hefur átt erfitt líf. 

Í dag, hugsa ég jafn hlýtt til fjölskyldu morðingjans og til fjölskyldna fórnarlambanna. 

Kolbrún out