Kaupmannahöfn:)

  Ég fékk alveg ótrúlega skemmtilegan tölvupóst á föstudaginn, ég hafði í gamni mínu prófað að sækja um íbúð sem stéttarfélagið mitt á í Kaupmannahöfn í sumarfríinu.  Og viti menn, ég fékk íbúðina í viku.  Akkúrat á þeim tíma sem vinnustaðir okkar beggja eru lokaðir, leikskólinn er lokaður og skólastrákarnir auðvitað í fríi.  Þvílík hamingja hjá litlu strákunum mínum að fá að fara til útlanda í sumar.  Og við hjónin erum sérlega ánægð með þetta, því það er bæði erfitt að vera með fimm manna fjölskyldu á hótelherbergi, auk þess sem brunavarnir í Evrópu banna hótelum að vera með meira en fjóra saman í herbergi þannig að við þyrftum annaðhvort að skipta fjölskyldunni í tvennt eða að leigja eitthvað fjölskylduherbergi sem er lítið um og rándýrt.

Þannig að Kaupmannahöfn er málið þetta sumarið með fjölskylduna, vonandi með viðkomu í Billund í Legoland en það er draumur yngri kynslóðarinnar að heimsækja Legoland. 

Í fyrrasumar vorum við á Íslandinu góða allt sumarið með ungana okkar í sumarfríinu og gerðum svosem ekkert sérstakt nema mála húsið og ditta að, auk þess sem við fórum í dagsferðir innanlands.... strákarnir eru því mjög ánægðir með gang mála fyrir sumarið núna:)

 

Ég vinn með alveg hreint frábæru fólki.  Á síðasta ári fór allur starfsmannahópurinn minn saman til Boston í frábæra námsferð og hópurinn var varla lentur á Íslandinu aftur þegar hópurinn fór að plana næstu ferð, sem áætlað er að fara haustið 2008.  Í dag var starfsmannahópurinn minn með kompusölu í Kolaportinu til fjáröflunar og þvílíkt magn af kompudóti sem starfsfólkið safnaði saman fyrir daginn, samt er hálft annað ár þar til áætlað er að fara í þessa ferð. 

Kolbrún out