Eru Íslendingar feimnir?

Það er megavika hjá Dominos.  Strákarnir mínir elska Dominos og stundum eru keyptar pizzur á þessari tilteknu viku, við mikinn fögnuð heimilisfólks.

Ég fór í dag og náði í pizzu upp í Lóuhóla.  Það var fullt af fólki þarna að bíða eftir pizzum í röð.  Meðal annars einn maður sem talaði við alla í röðinni um daginn og veginn, þar á meðal við mig.  Hann fór að segja mér að það væri ótrúlegt hvað Íslendingar væru feimnir, að fólk þyrði ekki að yrða á hvort annað nema að hella sig blindfullt fyrst.  Og hann tók það sérstaklega fram að honum finndist konur vera farnar að hella meira í sig en áður.  Hann sagðist ekki hafa tekið svo mikið eftir þessu fyrr en hann flutti erlendis og kom svo heim aftur.  Þá sá hann muninn á fólkinu í landinu sem hann fluttist til og svo Íslendingum, að Íslendingar væru mjög feimnir. 

Fyrsta sem ég hugsaði í röðinni, áður en maðurinn gaf sig á tal við mig var að þessi væri örugglega fullur.  En hann var það ekki, hann var bara í röðinni eins og aðrir í vinnugallanum og talaði út í eitt.  Við eigum þessu ekki að venjast að það hreinlega vaði á ókunnugu fólki í röð að bíða eftir pizzu.  Þarna sáust í raun mínir fordómar.... kannski er ég bara feiminn Íslendingur sjálf, jafnvel þótt ég eigi mjög gott með að kynnast fólki og upplifi mig ekki feimna í daglegu lífi. 

Mér fannst frábært að hitta fyrir þennan mann í dag sem virkilega þorði að vera hann sjálfur, værum við ekki hamingjusamari ef við þyrðum að vera við sjálf alltaf og værum ekkert að sýnast fyrir náunganum

Það er spurning

Kolbrún

Athugasemdir

[Kristbjörg Þórisdóttir, 15.2.2007 kl. 23:35]

Hæ,

gæti ekki verið meira sammála... njóta þess að spjalla við aðra. Það eina sem gerist að fólk nenni ekki að spjalla og það verður þá bara að setja mörk!